C”A CAPA DINT”O PALLONE – Giuseppe Maria e ‘o bambeniello

di Domenico Ascione (Twitter: @vesuvilandia)

C’avimmo ‘a fà ‘na statua a Ronaldo. A Ronaldo? A Ronaldo, sì, pecché si ‘o frisco (e ttuosto) Pallone d’oro nun jucasse dint”o Real, forze nun c’avessemo maje ‘ncarrato ‘a piglià a stu fenomeno c”o nummero 7 areto ‘e rine. Fino a poco tiempo fa pareva quasi ca c’avevamo abbuscato ‘o meglio pacco, e ‘mmece ce simmo assicurate a nu Fuoriclasse c”a “f” majuscula, p”o ddicere cu Eduardo. Destro, sinistro, Callejón segna ‘a tutte parte, ammacaro pure cu ll’uocchie chiuse. Pacienza, l’importante è ca ll’uocchie apierte ‘e ttenimmo nuje, pe ce putè gudè tutt’e mmeraviglie ‘e José María nuosto. Dudece gol uno cchiù bbello ‘e n’ato, ma ‘o primmo d’ajere ssera è ‘na perla da s’astipà paricchie ‘nfunno. ‘Na staffilata a volo, nu colpo ‘e ggenio degno ‘e n’artista vero, chiaro e tunno. E fosse ca tenimmo sulo a isso… Doppo ‘o 2-0 c”o Verona s’è mmiso c”a capa e c”o penziero pure Lorenzinho, nu palmo e nu ‘nzeracchio ‘e classe e core azzurro. Giuseppe Maria e ‘o bambeniello; ma chi v’ha ditto a vvuje ca ‘e ciuccie nun vulavano?