C”A CAPA DINT”O PALLONE – ‘Ncoppa jamme jà

di Domenico Ascione

Finalmente, doppo tanta chiacchiere e tabbacchere ‘e lignamme (ca né ‘o Banco ‘e Firenze né chillo ‘e Napule ne ‘mpigna), sabbato se joca ‘a sfida ‘e ll’anno. ‘Ncoppa â carta ‘a squadra ‘e Benitèz quacche ccusarella ‘e cchiù ‘o ttenesse, però, se sape, dinto a nnuvanta minute figurate quanta cose ponno jì storte: nu Pipita ca nun se trova o ca nun trova ‘a via d”a porta, nu Maggio ca è accuminciato ma nun se fida ancora ‘e movere, ‘o ggenio ca tene Insigne, ‘a luna ca tene Inler, ‘a grazzia si c”a fa Marek… Però ‘na cosa è certa comme ‘a morte: pe vvencere sti ppartite ce vonno classe, tecnica, tattica, forza fisica e nu curaggio ‘e tigre, però conta pure ‘na cosa ca nun addora ‘e rosa: l’esperienza. Sì, l’esperienza, l’ “ausanza” a mantenè ‘a calma quanno ‘a posta è alta. Da chistu punto ‘e vista, Don Rafè a Vicenziello Montella ‘o manna â scola: ‘na Coppa d’Inghilterra, ‘na Supercoppa, ddoje vote ll’Europa League, ‘na vota ‘a Champions. Pecciò, scaramanzie e ciucciuvettole varie a parte, ‘e favurite simme nuje, dicimmancello chiaro e tunno. E chi nasce tunno, comme ero ‘o fatto? Nun pò mmurì Cuadrado.