C”A CAPA DINT”O PALLONE – Smiente chi parla

È sempe accussì: “Higuaín va ‘o Barcellona”, “ormai dice ca ha firmato e nun se pò ffà cchiù niente”, “mettimmece ll’anema in pace” eccetera eccetera. Tutto chesto pe avè ditto ca le piacesse ‘e jucà cu Messi, cioè comme si Rocco Siffredi (fiorette mundiale a parte) avesse ditto ca le piaceno ‘e ffemmene. Certo, ‘e ggiurnale s’hanno ‘a vennere, me pare evidente, e ‘na granda squadra comme vò addeventà stu Napule primma o poi c’ha dda fà ‘o callo. Certo, ‘o Pipita puteva pure dicere: “Guagliò, sto bbuono addò stongo”, ma purtroppo sarrà forte quanto vulite vuje però ‘o nnapulitano astritto nun è arta soja. E mo, doppo ‘a tempesta ca ha arresecato ‘e menà tutte cose pe ll’aria, liggimme ‘a smentita ‘e Liberti, l’assistente ‘e Sabella all’Argentina: «Gonzalo è stato chiaro, ha detto che non sono vere le notizie di un interesse del Barça e che ora è concentrato solo sul Mondiale». Le fa eco chella d’o Napule “in persona”: «Le indiscrezioni giornalistiche secondo le quali @G_Higuain potrebbe essere ceduto al @FCBarcelona sono destituite di ogni fontamento». Ca pò, isterie e sentimentalisme a parte, ‘a quistione è assaje cchiù semplice ‘e chello che pare: el señor Higuaín tene nu cuntratto pe cinche anne culurato d’azzurro, è stato pavato 40 meliune (uanema d”o Priatorio!, ndr) uno ‘ncuollo a n’ato, pecciò, si proprio quaccheduno ne vulesse parlà, o se parte a sissanta o nun s’accummencia manco a cuntrattazzione. Intanto dice ca è arrivata ‘na siconda smentita doppo ‘a partita d”a Spagna: «’O suonno mio fosse ca ll’anno che vvene riscattasseme a Edu Vargas; ato ca Messi… vuò mettere?».

di Domenico Ascione (Twitter: @vesuvilandia)