C”A CAPA DINT”O PALLONE – ‘E Conte nun tornano

Se pò essere campiune pure senza scarpette? ‘A strabbiliante carriera d’Antonio Conte ‘ncoppa ‘a panchina d”a Juve racconta ‘e sì. Tre anne, tre scudette, ddoje Supercoppe Italiane e ‘a sensazzione netta ‘e sapè sempe chello ca faceva. Già, “faceva”, pecché comme a nu fulmine a ciel sereno è arrivata ‘a nutizzia d”o mancato rinnovo in bianconero d”o tecnico pugliese; nu popolo in rivolta, ‘na piazza arrevutata dall’inaspettato addio ‘e nu Napulione ca oramai n’hanno perduto adderettura ‘o stampo. ‘Na squadra pigliata dall’inferno e purtata ‘n’ata vota dint”o Paraviso d”o pallone a botte ‘e fatica, scelte curaggiose, fatica, ordine, gerarchie e fatica. Fatica, insomma. Nun ce sta nisciuna scurciatoia, niscuna manera scuntata p’arrivà a vvencere accussì assaje senza se sentì doppo a nu poco tiempo a panza chiena. ‘A tecnica conta, ce mancasse; ce vonno grinta, abilità, talento e classe. Però ‘a capa fa miracule, guagliù. ‘A capa, ‘a capa, ‘a capa… “’A capa mia nun è bbona, perché non riesco a capire”, se stanno adduluranno sotto â Mole. E ‘mmece a Roma e a Napule dint”e ccape e morto scorreno sciumme ‘e sciampagna. Comme si ‘a Vecchia Signora mo mettesse nu poco meno appaura, comme si stu trambusto avesse scetato d”o suonno a nu ciuccio ‘e Fechella e ‘na lopa ca dormono. Stanno Allegri lli bambine, ccà ‘e Conte nun tornano.

di Domenico Ascione (Twitter: @vesuvilandia)