C’ ‘A CAPA DINT’ ‘O PALLONE – Sta’ senza penziere

– Presidè, v’aggio purtato ‘e sorde d’abbunamento…

– Bravo, bravo. Mo t’aggio ‘a fà nu bellu regalo; c’accattamme a Agger, a Eto’o e a Mascherano.

– (Sorpreso.) Mascherano? Ma overo dicite?

-Sta’ senza penziere.

-Vabbuò, je ve crero, ma ll’anno passato pure aveva ‘a venì e pò alla fine sotto â maschera d”o lione s’è presentato chillu paccotto ‘e Inlèr. Pò c’accattamme a Touré, a Messi, a Cristiano Ronaldo…

– Wà, bellissimo!

– (Gli porge un bicchiere di acqua “Lete” ingiallita.) Bive, bive, aggio ‘a vedè si me pozzo fidà ‘e te.

– Madò, chi schifo!

– Si je te tradisco, a te ca me vuò bbene overamente e invece je bene nun te ne voglio proprio e penzo sulo ca si’ nu povero scemo…

– Ma chi, io?

– Sta’ senza penziere.

– Sì, vabbuò, aggio capito, ma allora è sicuro ‘o fatto ‘e Messi?

– L’ommo ca pò fà a meno ‘e tutte cose nun tene paura ‘e niente.

– Sì, però vulesse capì che programma tenimme ‘ncoppa ô mercato…

– Oramai pure ‘e scinnie se sentono in diritto ‘e s’ assettà a ttavola cu ‘e cristiane.

– C”o pigliammo o nun c”o pigliammo a stu Mascherano?

-‘E sorde fanno ll’ommo onesto.

-Ma ‘e sorde ce stanno, Presidè; me sta venenno ‘o dubbio ca nun ‘e vvulite caccià.

– Songo je che cummanno?

– Se capisce, se capisce, però sapite, nu scudettiello ogne tanto nun facesse male.

– Sta’ senza penziere.

– (Adirato) Ma je nun tengo penzieri! Voglio sapè sulo si… (s’interrompe bruscamente.)

– (Silenzio.) Viene, viene. Vienete a piglià ‘o perdono, viè.

Si avvicina a “Presidè” singhiozzando, costernato e pentito di aver osato tanto.

A cura di Domenico Ascione (Twitter: @vesuvilandia)