C”A CAPA DINT”O PALLONE – Questi fantasmi

Dramatis personæ

Rafael Cabral (anima libera): Se ne va a spasso pe ll’aria ‘e rigore; ogne asciuta a vvacante nu patemiento ‘e core.

Raúl Albiol Tortajada (anima perduta): Perduta e perdente. D”o marcatore arcigno madridista luntanissimo parente.

Kalidou Koulibaly e Lorenzo Insigne (anime innocenti): Stuorte ‘o muorte se portano ‘a pagnotta â casa, ma è poco pe ssalvà ‘sta varca sgarrupata da ll’acqua ca ne trase.

Marek Hamšík (anima triste): Pareva mo mo asciuto d”o ricovero, e ‘mmece s’appresenta ‘n’ata vota c”a pistola dint”o fodero.

Faouzi Ghoulam (anima utile): Uno d”e poche ca se dà ‘na mossa; premmune ‘e fierro, fisico e pure quacche cross.

Gökhan Inler e David López Silva, sua moglie (anime inutili): ‘A Roma tene a Pjanić e a De Rossi, ‘a Juve vanta a Vidal, Pirlo e Pogba; nuje a dduje ectoplasme scipete, c’avimme ‘a accuntentà.

Gonzalo Gerardo Higuaín (anima irrequieta): Se sbatte, allucca, scalpita, piglia ‘a partita ‘e pietto; le sbatteno ‘o spurtiello ‘nfaccia da ‘o dischetto.

Christian Maggio (anima dannata): Dannato si’, mi’ Signore, ca ancora nun te l’haje chiammato.

José María Callejón Bueno (anima condannata): Dint”a ‘sta banda ‘e musica, ‘na luce ca cunforta; però s’ha dda fa gol a tu pe tu c”a porta.

Duván Zapata (anima nera): ‘Na sola palla tocca e subbeto è rigore. Cu cchisti chiare ‘e luna sta troppo tiempo ‘a fora.

Rafael Benítez Maudes (anima in pena): A Liverpool mo vaco, me piglio ‘na vacanza. Pò torno ‘nterra Napoole… nu vutamiento ‘e panza.

Andate in pace, la Commedia è finita. Maestro, so’ trent’anne ca ce manche, ma pare già ‘na vita.

di Domenico Ascione (Twitter: @vesuvilandia)