C”A CAPA DINT”O PALLONE – Sparta Praga vs. Napoli (‘e ppaggelle)

RAFAEL 5,5: Nu paro ‘e salvataggie importante, però ahimè pure ‘e ssolite tre-quatto asciute a vvacante.

MESTO 5,5: Comme dicessero a X Factor, “per me è no!”.

ALBIOL 6: Quanno ‘a speranza era ormai morta, se veste da Rafiluccio a tu pe tu c”a porta.

KOULIBALY 6: A nu certo punto lassa barracca e guarratelle, se penza ‘e essere Zidane e se mette a fà ‘a veronica. Maya cchiù ‘na cosa ‘e chesta.

BRITOS 5,5: Cinche minute e già fa ‘o giallo; comme a chello ca facimme nuje ogne santissima vota ca tocca ‘a palla.

GARGANO 6: A pallone se joca cu ‘e piede. Appunto.

CALLEJÓN 5: Stavota el pistolero s’ha avuto ‘a scurdà ‘o fierro â casa.

JORGINHO 4,5: Dice ca “Chi l’ha visto?” s’è apparato già ‘a puntata pe miercurì e ssera.

D. LÓPEZ 5: ‘O frate ‘e Giorg… inho.

(77′ GHOULAM s.v.) Pe ffurtuna nun tene manco ‘o tiempo e se fà strascenà ‘mparanza dinto a ‘na serata storta.

HAMŠÍK 5,5: Pe ‘na bbona oretta ‘a partita s”a guarda ‘e renza, pò s’addona ca ‘o pavano e lle saglieno ‘e scupule ‘e cuscienza.

HIGUAÍN 5: Nun ‘a vede manco pe scagno; nu piezzo ‘e guaglione ‘e chella manera…

(69′ ZAPATA 5): Vinte minute senza riuscì a ‘ngranà ‘a marcia. Se vede ca – comme ‘a Benítez – tene ‘o cagno automatico pur’isso.

di Domenico Ascione (Twitter: @vesuvilandia)