C”A CAPA DINT”O PALLONE – Guaglione (ca t’haje miso ‘ncapa vuò capì ‘e pallone)

Guagliù, calmammece nu poco e arriciatamme. Nun so’ cascpito ‘e scennere p’’a via ca ‘o ferraro me ferma e me fa: “Ma jamme, addò c’avviammo chist’anno?”; po’ me piglia ‘o verdummaro e m’allucca dint”e rrecchie: “Neh, ma chillu purtiere… addò l’hanno juto a piscà?”. Pe’ nun parlà d”o guaglione d’’o barbiere ca dice ca chillu chiattone ‘e Benitèz se n’ha da jì â Spagna pecché ‘o pallone invece d”o capì s”o magna. Sissignore, tenite raggione tutte quante. Aggio capito ca cierti vvote parimme ‘na bbanna ‘e musicante stuorte, però nun se pò fà ca comme ‘a squadra vence ‘a saglimme ‘ncielo e pò ‘a semmana appriesso so’ jastemme ‘e morte . Avite sentuto ‘a televisione? Avite liggiuto ‘o giurnale? No, che c’azzecca chillo c’hanno arrestato a Roma? Diceno ca ‘o Napule s’accatta a Gabbiadini d’’a Sampdoria. L’ha pavato unnece meliune (unnece meliune? Uh anema d’’o Priatorio!). Sì, ‘o ssaccio ca nun abbasta e c’arreto stammo ‘nguajatielle. Però zittu zittu, tomo tomo, cacchio cacchio, cuoncio cuoncio stamme accummincianne a arreparà ‘sta navicella abbuccata ‘nu poco a ccà e a llà. Avimme ‘a purtà pacienza, arrangiammece cu’ chello ca già tenimme e astipammece ‘o pirlo (fosse ‘a Madonna, ndr)… ehm ‘o piro pe’ quanno ce vene ‘a sete. E nun facimme comme a chill’amante scustumato ca manco n’anno doppo ô spusalizzio perdette ‘a fede.

di Domenico Ascione (Twitter: @vesuvilandia)